اخوي الفيهو اقلااااااااام الشعر بتجف
اخوي الصاقعــة والسيـف البختف كف
اخوي البعــدل المايلـه ويركـز الصف
قدمو تقيله ساعــه العركـه مـا بتخف
اخوي حلال الشبـك يوم الدواخل إحرن
اخوي الديمه راكز وفي المحاص بتحرن
الخيراتــو فوقــنـا وفــوق بلــدنا انشرن
صفاتو حميده صبحن في الكتب بتقرن
ما بنـلاك و دربــو هــلاك وموتــا فاجع
ابوالجيلاني اخوي قاهر الخصوم الناجع
الكازاهـو شبعـان ديمـه مغـس ومواجع
والفـكــاهـو مــا ظنيـتــو يرجــع راجع
اخوي القلبــو لي الخاواهو باقـي شفيق
اخوي تمساح دميره وديمه بحرو غريق
اخوي البــروي اعطاشنـا ونشـاف الريق
اخوي الفي الفرااسه براهو شاقي طريق
اخوي الحاسي بي الجـواي وداري البيا
غير منــو البطبـق لي الخصـوم الكيه
الخاواهــو بشبــع فــي اللحــم والشيه
والعاداهــو بمــلا كبــدتو نيـران حيه
اخــوي ود الاصــول البنجـدو الدركانه
اخــوي الغضبــو نيران انفجـر بركانه
اخــوي البدخل العركـه ويزيد عركانه
اخـوي المن فضايلـو بغرفو بالجركانه
هيلو العفـة مــن اجــدادوا هيلـو العز
وهيلو مخــاده العركــه النحاســه برز
يوم صهلي الخيول يوم الفطاحلـه تفز
بخلـي الــدم يدفــق مــن عدوهو ينز
اخويا امين وطبعو امين وشكلو امين
كـم خشالو وكـرا وكـم نصبلــو كمين
لي ضيفانو حـد بتكي الغـلاد وسمين
يحفظو ربــي خالق الامــة قولو امين
ابوك ياجيلي اسدا في المحاص بتقدل
ابوك يا الجيلي فـوق المية سـوا معدل
ابـوك الخـوف الاسـد اب نيـاب وجددل
البتنيهـا تانــي قسمتـة مــا بتتعدل
ابوك آ الجيلي فارس دارجعل بي حاله
فجـاج لـي الـدروب الوعــره و الوحاله
يوم الدنيا تضيـق تبقي صعبه الحاله
بدفع مالو ده الما عنـدو حاجه محاله
المــال العشانــو النــاس تسافــر برا
عند الدخري اخوي مابسوي مثقال زره
طريقو عديل طلاق في فارقه ما انزره
فارس عركــه اليــوم اب كتالــن حرا
مــا ختالــو كلمــه وتانـي منهــا تره
ولا سوالــو شينـه وفـي اللســان انجره
الــدود البخلــي خصيمـو يـاخـد فره
امرق روحـك إن كرفـس وشيهـو وصره
طبيب طيبه ما معقول وهادي هداوه
وضربــه ايـدو قالو من المحال تتداوه
غير ما عندو في الحوبات ثبات ورداوه
جيبــو ومالـو بيناتــن كجــار وعداوه
ظـروف الدنيـا مهما تقسـي تلقاو ثابت
ما بتلقــاو يضـارب وفي رفاقتـو يخابت
مـا دفنولـو ســراً وليهــو اصبـح حابت
كريمه اخلاقو مــن اشـرف قبايل نابت
رجال بتخاف وترجف ان زكرتلــن اسمو
سيفو الحامــي لي كـل البصادفو بقسمو
كريم ومكانــو من فــوق نجمنـا بيسمو
والبحدرلو خـوف ســاكت بشـوك جسمو
ابو الجيلاني اخـوي فضايلـو مـا بتنعده
حنين كان جيتو بفرشلك ضراعو مخده
كان عاديتـو تـب قـام لـي كتالــك جده
لا بــرجــع ولا بنــســاق ولا بنـصـده
في قــوه وفراسـه بواجــه الزيـر سالم
بخش المعركه ام قصطير وبمرق سالم
اصلو بشوش وديمه خدوم وطبعو مسالم
بلاقي ضيوفو بي صينيتـو قبلي يسالم
الرئيسية 